Përmes videos së postuar në Facebook, Gashi tha se nga Kurti presin punë dhe se ai është dështuar.
“Mirëmëngjesi kryeministër. A ka ndonjë gjetje nga mbledhja e 100-të e qeverisë? Apo, ti duhet të punosh ndonjë gjë që të kesh rezultat, nga ti presim projekte dhe punë konkrete, për ndryshe je i dështuar”, ka thënë Gashi.
Kurse, Tahiri i AAK-së i tha kryeministrit se nuk ka vend për analizë të të gjeturave, por se ka nevojë për prezantim të vendimeve.
“Mirëmëngjesi qytetarë të Kosovës! E pashë që kryeministri e kish postuar një video dhe na tregonte që në mbledhjen e 100-të është duke bërë analizën e gjetjeve. Porosia ime për Qeverinë dhe kryeministrin është që nuk ka vend për analizë të të gjeturave, por ka nevojë për prezantim të vendimeve, rezultateve prej të cilave kanë përfituar qytetarët dhe vendi ynë. Përshëndetje nga Strasburgu!” , ka thënë Tahiri.
Ndryshe, ky reagim i tyre vjen pasi të mërkurën kryeministri Kurti përmes një videoje ka folur për mbledhjen e 100-të të Qeverisë së Kosovës që është mbajtur të mërkurën.
Ai bën të ditur se në këtë mbledhje do të flasin për të gjeturat e ministrive në këtë periudhë qeverisese dhe do të votojnë 12 pika që janë në rendin e ditës.
Mes tjerash, Kurti u ka bërë thirrje të gjithë qytetarëve që të përcjellin mbledhjen.
“Sot mbajmë mbledhjen e 100-të të qeverisë. Do të flasim për të gjeturat e ministrive në këtë periudhë qeverisëse e do të votojmë në 12 pika të rëndësishme për të cilat ju ftoj t’i ndiqni drejtpërsëdrejti, pas pak, në faqen e Qeverisë së Kosovës e në të timen po ashtu”, shprehet Kurti./teve1.info/