Tomë Gashi, avokati i familjes Dehari tha se Astrot Dehari është vrarë nga dikush që ka pasur qasje në Qendrën e Paraburgimit në Prizren.
Sipas Gashit, nuk është e vështirë të zgjidhet ky rast.
“Është rasti i thjeshtë nëse duan me zgjidh ashtu si tregojnë plagët e Astrit Deharit. Ashtu qysh tregon trupi, qysh tregojnë edhe fotografitë e Astrit Deharit gjatë obduksionit. Janë plagë që nuk mundesh me ia shkaktu vetvetes dhe kurrkush nuk ka dhënë kurrfarë sqarimesh, qysh mundet ato plagë, një mori plagësh që ekspertët e pavarur i kanë konsideru si plagë vetmbrojtëse, i bjen nëse ti më sulmon dhe unë mbrohna prej teje dhe nëse unë vdes, është vrasje”, ka thënë Gashi në Ditari në Tëvë 1.
Sipas Gashit ka pasur neglizhencë të madhe në rastin e Astrit Deharit, ashtu që ende nuk është nxjerrur vendimi për hetimin e rastit si ‘vrasje’.
“Neglizhenca e prokurorit ka bërë që ne të jemi në vitin e 7 të hetimit të vrasjes ndërsa ai nuk ka nxjerrë hala vendim për hetimin si ‘vrasje’. Fillimisht këta fillun 30 minuta pas vdekjes së Astrit Deharit. Se Astrit Deharin e kanë dërgu të vdekur në spital. Edhe këtë e thonë dokumentet, fletëlëshimi i Astrit Deharit. Janë mjekët tanë, janë mjekët gjallë, janë të vulosura, të protokolluara dokumentet që ai është dërguar pa puls, pa shenja jete. Këta njerëz thonë jo Astritit janë munduar me i dhanë 50 minuta ndihmë po ai ka vdekur në spital. Paramendo çfarë logjike se gjithmonë e kanë shndërruar rastin e vrasjes së Deharit në rast për opinion publik. Ti ke pas televizione që e kanë qit CD-në e korridorit të burgjeve para prokurorisë. Dhe ish-prokurori e ka pranuar që nuk e ka atë CD”, ka shtuar ai.
