Analisti politik, Xhevdet Pozhari ka deklaruar se kandidati i Lidhjes Demokratike të Kosovës (LDK) për kryetar të Gjilanit, Arbër Ismajli është një emër që do të harrohet menjëherë pas përfundimit të zgjedhjeve lokale.
Ai në emisionin “Info Nata” në Tëvë1 është shprehur se Ismajli nuk përbën aspak rrezik për kandidatin e Lëvizjes Vetëvendosje (LVV), Alban Hyseni i cili do të garojë për mandatin e tij të dytë.
Kandidatin e LDK-së, Pozhari e ka quajtur marionetë të ish-kryetarit të Gjilanit, Lutfi Hazirit përmes së cilit sipas tij ky i fundit pretendon të ketë kontroll në atë pjesë.
“Pas mbajtjes së zgjedhjeve në Gjilan Arbër Ismajli do të jetë një emër që prapë do të harrohet në studio televizive ashtu siç ka qenë edhe shumë kandidatë të tjerë në zgjedhjet e vitit 2021. Nëse nuk gaboj kanë qenë 165 kandidatë për kryetar komunash dhe shumicën prej tyre më as nuk e dimë a merren me politikë e lëre më të na kujtohen emrat. Pra, nuk do të përbëjë ndonjë rrezik për Hysenin shkaku se kandidatura e Lutfi Hazirit do të ishte më serioze në këtë aspekt, por siç duket Haziri nuk dëshiron të shkëputet shumë nga qendra, duket se e ka kuptuar që nëse lokalizohet në një komunë atëherë këtu në qendër mund të ndodhin zhvillime të ndryshme dhe ata që janë më afër derës e kalojnë pragun. Haziri nuk dëshiron të jetë i margjinalizuar por ka preferuar një marionetë të cilën do ta kontrollojë, pra njëfarë forme do të ketë kontroll edhe në Gjilan edhe në qendër në kryesi por mendoj se kësaj rradhe i ka bërë përllogaritjet gabim”, ka thënë Pozhari.
