Sipas institutit GAP, tërheqjet e shpeshta nga Trusti do të dëmtonte kredibilitetin e Trustit në tregjet financiare.
Në hulumtim thuhet se në rast se aprovohet ky ligj, Trusti obligohet që të fillojë procedurat për shpërndarjen e deri 594 milionë eurove, apo afër çerekun e mjeteve që ka nën menaxhim.
➡️Trusti obligohet që të fillojë procedurat për shpërndarjen e deri 594 milionë eurove, apo afër çerekun e mjeteve nën menaxhim të Trustit;
➡️Ligji do ua mundësonte tërheqjen e kursimeve 695,523 kontributdhënësve;
➡️Afër gjysma e kontributdhënësve (48.6%) pritet të tërheqin mesatarisht nga 96.5 euro;
➡️Tërheqja e mjeteve do ua pamundësonte qytetarëve që në të ardhmen të blejnë edhe anuitetin e jetës, një mundësi ku përmes pagesës së një premiumi, kontributdhënësit do të mund të pranonin një pension gjatë tërë jetës pas pensionimit;
➡️Shuma e nevojshme e kursyer e një kontributdhënësi/e për të blerë një anuitet minimal do të duhej të ishte rreth 25 mijë euro në kohën e pensionimit;
➡️Tërheqjet e shpeshta nga Trusti do të dëmtonin kredibilitetin e Trustit në tregjet financiare;
➡️Projektligji i 2022 nuk parasheh rimbursim të mjeteve të tërhequra.
Zëvendëskryeministër i parë i Qeverisë, Besnik Bislimi theksoi se Qeveria e Kosovës është kundër tërheqjes së kursimeve pensionale dhe se nuk e përkrah një nismë të tillë.
“Sipas z. Bislimi, nisma të tilla që synojnë të prekin fondin pensional do të dërgojnë në shkatërrimin e kësaj shtylle të rëndësishme të shtetit. Për më shumë, ai theksoi se numri më i madh i kontributdhënësve do të mund të tërheqnin një pjesë të vogël të mjeteve në kuadër të këtij ligji, dhe se rritja e parasë në treg në një periudhë kur po përballemi me inflacion të importuar nuk është politikë adekuate”, thuhet në komunikatë.
Në tryezë morën pjesë dhe përfaqësues të institucioneve vendore dhe ndërkombëtare, sikurse nga Banka Botërore, Fondi Monetar Ndërkombëtar dhe mediat.
Kryeministri i Kosovës, Albin Kurti, në mbledhjen e Qeverisë kishte deklaruar se nëse Kuvendi voton për një tërheqje të re nga Trusti, ky do të ishte “rrënim” i kursimeve të qytetarëve./teve1.info./
