Sulmuesi i Holandës, Cody Gakpo është futur në garë për t’u shpallur golashënuesi më i mirë i Kampionatit Evropian “Gjermania 2024”.
Me golin e shënuar në fitoren e Holandës ndaj Rumanisë 3:0 në 1/8 e finales, Gakpo ka arritur në kuotën e tre golave të realizuar dhe një asistimi në katër ndeshje të luajtura deri më tani në “Euro 2024”.
Ai tashmë i është bashkuar në krye të listës lojtarëve si Georges Mikautadze, Jamal Musiala e Ivan Schranz që gjithashtu kanë të shënuar nga tre gola në Evropian.
Megjithatë, Mikautadze dhe Schranz më nuk janë në garë pasi Gjeorgjia dhe Sllovakia janë eliminuar në 1/8 e finales, ndërsa Gakpo e Musiala do të paraqiten edhe në fazën çerekfinale të këtij turneu.
Gakpo me Holandën në çerekfinale do të përballen me Turqinë, ndërsa Musiala me Gjermaninë do të luajnë kundër Spanjës në këtë fazë të Kampionatit Evropian.
Ndeshjet e fazës çerekfinale, në të cilën janë kualifikuar tetë kombëtare do të luhen të premten dhe të shtunën.
