Federata e Xhudos e Kosovës ka bërë të ditur se një grup i xhudistëve nga Panamaja, janë duke qëndruar në Qendrën Nacionale të Xhudos, në Pejë.
Duke marrë shembull për mënyrën se si është zhvilluar dhe rritur sporti i xhudos kosovare në botë, shumë shtete, edhe më parë, kishin vizituar ekipin e xhudos Ippon nga Peja, në mënyrë që të merr mësim si të zhvillohet xhudoja.
“Diplomacia publike në kuadër të xhudos. Ekipi i xhudos nga Panama po vazhdon të qëndrojë në Qendrën Nacionale të Xhudos në Pejë ku po zhvillohen stërvitjet bashkë me kryemjeshtrin Driton Kuka, trajneren Majlinda Kelmendi dhe xhudistët e tjerë të Kosovës.
Përgjatë muajit do i presim edhe rreth 100 garues nga 15 shtete, duke forcuar më tej rolin e xhudos si një mjet i fuqishëm për nxitjen e mirëkuptimit dhe bashkëpunimit ndërkombëtar”, ka shkruar Federata e xhudos e Kosovës në Facebook.
Ditë më parë edhe përzgjedhësi i Kosovës dhe arkitekti i sukseseve të xhudos, Toni Kuka, ka njoftuar se përveç xhudistëve nga Panamja, në Pejë do të arrijnë edhe rreth 100 garues nga mbi 15 shtete në stërvitje me ekipin kosovar.
