Drejtori për Siguri dhe Emergjenca në Komunën e Prishtinës, Lulzim Fushtica ka folur për planin për subvencionimin e adoptimit të qenve endacakë.
Fushtica ka thënë se kjo është pjesë e një plani që fillimisht konsiston në largimin e qenve endacakë nga rrugët e kryeqytetit dhe vendosjen e tyre në strehimore.
“Plani konsiston në dy pika kryesore: Largimi i qenve endacakë nga rrugët e kryeqytetit, vendosja e tyre në strehimore. Për momentin është vetëm një strehimore e cila është e licencuar nga Agjencioni i Veterinës dhe Ushqimit, e cila e ka të drejtën të mbajë qenë dhe të strehojë dhe ne do të subvencionojmë mbajtjen e këtyre qenve në strehimore dhe trajtimin e tyre dhe do të bëjmë mbikëqyrjen sepse një prej brengave që është shfaqur dhe e kuptojmë, ka qenë që këta qenë janë keqtrajtuar apo nuk janë mbajtur në mënyrë humane, në mënyrë të drejtë se si duhet të mbahen në strehimore dhe ne do të mbikëqyrim këtë proces bashkërisht edhe me aktivistë dhe shoqata për mbrojtjen e kafshëve”, ka thënë Fushtica.
Fushtica ka thënë se për t’i përcaktuar kushtet e adaptimit do të përpilohet një rregullore me kritere strikte.
Ai ka shtuar se ndaj personave që lëshojnë apo keqtrajtojnë qentë që i marrin për adoptim, do të ketë gjoba.
“Ne jemi duke përfunduar rregulloren e cila do t’i përcaktojë kushtet strikte se si një person do ta adaptojë. Do të ketë kontratë mes individit dhe kryeqytetit dhe do të përcaktohen obligimet që qytetari do t’i merr me adoptimin e qenit por edhe komuna kundrejt qytetarit. Do të jetë strikte dhe do të parashohim edhe gjoba në rast se evidentohet keqtrajtimi por edhe në rast se personi e lëshon. Gjoba do të jetë shumë monetare dhe do të jetë më shumë se vlera dhe do të kemi ekipe që do të bëjnë monitorimin e implementimit të kontratave”, ka thënë Fushtica në Ditari në Tëvë 1.
