Në përfundim të fushatës zyrtare për zgjedhjet, koalicioni i organizatave të shoqërisë civile Demokracia në Veprim ka publikuar një analizë përmbledhëse mbi ecurinë e saj në terren.
Raporti synon të pasqyrojë mënyrën e zhvillimit të aktiviteteve zgjedhore, përmbajtjen e mesazheve politike dhe nivelin e përfshirjes së qytetarëve gjatë kësaj periudhe.
Sipas Ismet Kryeziut, drejtues i DnV-së, procesi zgjedhor është zhvilluar kryesisht në një klimë të qetë dhe pa probleme të theksuara të sigurisë. Ai theksoi se fushata ka qenë aktive, me angazhim të vazhdueshëm të subjekteve politike dhe organizim të aktiviteteve në mbarë vendin. Megjithatë, vëzhguesit kanë evidentuar disa mangësi që, sipas tyre, kanë ndikuar në cilësinë e përgjithshme të fushatës.
Një nga gjetjet kryesore ka qenë niveli relativisht i ulët i mobilizimit qytetar.
DnV vlerëson se pjesëmarrja në tubime dhe takime elektorale ka ndryshuar ndjeshëm nga një subjekt politik te tjetri, duke lëvizur nga aktivitete me pjesëmarrje modeste deri te tubime me mbi një mijë qytetarë.
“Pjesëmarrja e qytetarëve në aktivitetet e fushatës është luhatur ndjeshëm mes subjekteve politike dhe formave të organizuara të takimeve, nga qindra pjesëmarrës deri në mbi 1000 pjesëmarrës. Llojet e aktiviteteve kanë qenë të kombinuarame pjesëmarrje të mesme dhe me pjesëmarrje të gjerë në prezantimin e listave, dhe janë zhvilluar kryesisht në ambiente të mbyllura. Shtrirja e aktiviteteve ka treguar përqendrim të subjekteve në qendrat urbane dhe komunat më të mëdha e me peshë elektoral, ndërsa komunat më të vogla kanë qene më pak të ekspozuara”, thuhet në njofitm.
