Apple po përshpejton përgatitjet për pasardhësin e CEO-s Tim Cook, i cili mund të tërhiqet nga detyra në vitin e ardhshëm.
Disa burime pranë kompanisë thanë për Financial Times se bordi dhe drejtuesit e lartë kanë shtuar përpjekjet për të siguruar një tranzicion të qetë pas më shumë se 14 vitesh udhëheqjeje të Cook në kompaninë me vlerë prej 4 trilionë dollarësh.
Sipas burimeve John Ternus, nënkryetari i lartë për inxhinierinë e harduerit në Apple, shihet gjerësisht si pasardhësi më i mundshëm i Cook, edhe pse nuk është marrë ende asnjë vendim përfundimtar.
Persona të afërt me Apple shpjeguan se ky tranzicion i planifikuar prej kohësh nuk lidhet me performancën aktuale të kompanisë, e cila pritet të përfitojë nga një periudhë e jashtëzakonshme shitjesh për iPhone në fund të vitit.
Kompania nuk pritet të emërojë një CEO të ri para raportit të ardhshëm financiar në fund të janarit, që mbulon periudhën kritike të festave. Një njoftim në fillim të vitit do t’i jepte kohë ekipit të ri drejtues të organizohej para ngjarjeve të mëdha të Apple, përfshirë konferencën e zhvilluesve në qershor dhe lançimin e iPhone në shtator. Burimet e Financial Times thonë se megjithëse përgatitjet janë intensifikuar, kohëzgjatja e çdo njoftimi mund të ndryshojë.
Cook, ish-shef i operacioneve në Apple, që mbushi 65 vjeç këtë muaj, udhëheq kompaninë që nga viti 2011, kur mori detyrën nga bashkëthemeluesi Steve Jobs, i cili vdiq disa muaj më vonë. Gjatë mandatit të Cook, kapitalizimi i tregut të kompanisë është rritur nga rreth 350 miliardë dollarë në 2011 në 4 trilionë dollarë sot.
Aksionet e Apple po tregtohen pranë nivelit të tyre historik pas rezultateve të forta të muajit të kaluar, edhe pse rritja e çmimit të aksioneve me rreth 12% këtë vit mbetet më e ulët se ajo e rivalëve të Big Tech, si Alphabet, Nvidia dhe Microsoft, të cilët përfituan nga entuziazmi i Wall Street për inteligjencën artificiale.
Apple ka pasur ndryshime të dukshme në ekipin e saj të lartë drejtues gjatë këtij viti. Drejtori i financave Luca Maestri, bashkëpunëtor i ngushtë i Cook, u largua nga detyra në fillim të vitit, ndërsa Jeff Williams, një protegjé i Cook, njoftoi dorëheqjen si drejtues i operacioneve në korrik.
Emërimi i Ternus do të vendoste përsëri një drejtues nga sektori i harduerit në krye të Apple, në një kohë kur kompania ka hasur vështirësi në futjen në kategori të reja produktesh dhe në konkurrencën me rivalët e saj të Silicon Valley në fushën e inteligjencës artificiale.
Cook ka shprehur preferencën që pasardhësi i tij të jetë një kandidat nga brenda kompanisë, duke thënë se Apple ka “plane shumë të detajuara për pasardhësit”.
“E dua këtë vend dhe nuk mund ta imagjinoj jetën time pa qenë këtu, ndaj do të qëndroj edhe për një kohë”, tha ai për këngëtaren Dua Lipa në podcastin e saj në nëntor 2023.
