Forca e Sigurisë së Kosovës ka shënuar një tjetër sukses ndërkombëtar, duke u dekoruar me Medaljen e Argjendtë në njërën nga garat më prestigjioze dhe më sfiduese ushtarake në botë — “Cambrian Patrol”, e cila organizohet çdo vit në Mbretërinë e Bashkuar.
Në këtë edicion morën pjesë 118 ekipe, përfshirë 35 ekipe ndërkombëtare nga 33 shtete të ndryshme, ndërsa ekipi përfaqësues i FSK-së nga Regjimenti i Dytë i Këmbësorisë i Komandës së Forcave Tokësore u vlerësua lart për profesionalizëm, disiplinë dhe përgatitje të shkëlqyer fizike e taktike.
Ministri në detyrë i Mbrojtjes, Ejup Maqedonci, ka përgëzuar ekipin për këtë arritje, duke theksuar se ky sukses është dëshmi e përkushtimit dhe standardeve të larta që FSK po arrin në skenën ndërkombëtare.
“Pjesëmarrja dhe sukseset e vazhdueshme të FSK-së në gara ndërkombëtare si ‘Cambrian Patrol’ dëshmojnë nivelin e lartë profesional dhe gatishmërinë operacionale të forcës sonë. Ky është një tjetër shembull i punës së palodhshme të ushtarëve tanë”, është shprehur Maqedonci në një postim në Facebook.
