Forca e Sigurisë së Kosovës ka realizuar me sukses trajnimin e avancuar në operacionet e kërkim-shpëtimit malor, një aktivitet ky i zhvilluar gjatë dy javëve të fundit në kuadër të Qendrës Ndërkombëtare Trajnuese për Kërkim-Shpëtim (QNTKSH).
FSK ka bërë të ditur se qëllimi i trajnimit ishte rritja e kapaciteteve profesionale të pjesëmarrësve për reagim të shpejtë dhe efikas në situata emergjente në terrene malore, duke theksuar zhvillimin e aftësive teknike, koordinimin ndër-njësive si dhe përdorimin korrekt të pajisjeve të specializuara.
Gjatë dy javëve, pjesëtarë të FSK-së dhe ekipe nga Turqia u përfshinë në skenarë praktikë që simulonin situata reale shpëtimi, duke zbatuar procedurat standarde dhe teknikat moderne të operacioneve malore.
“Qëllimi i trajnimit ishte ngritja e kapaciteteve profesionale të pjesëmarrësve në operacionet malore të kërkim-shpëtimit, duke forcuar aftësitë teknike, koordinimin dhe reagimin efektiv në situata emergjente. Trajnimi përfshiu skenarë praktikë, përdorimin e pajisjeve të specializuara dhe procedurat standarde të operacioneve malore, duke kontribuar ndjeshëm në avancimin e njohurive dhe përgatitjes së pjesëtarëve nga FSK dhe Turqia të angazhuara në këtë trajnim”, thuhet në njoftim. /teve1.info/
