Forca e Sigurisë së Kosovës, në bashkëpunim me Ministrinë e Arsimit, Shkencës, Teknologjisë dhe Inovacionit, po zhvillon ligjërata vetëdijesuese me temën “Rreziku nga mjetet piroteknike”nëpër shkollat e mesme të ulëta në gjithë vendin, në kuadër të planit vjetor të aktiviteteve.
Sipas FSK-së, qëllimi i këtyre ligjëratave është informimi dhe sensibilizimi i nxënësve për rreziqet dhe pasojat që shkaktohen nga përdorimi i mjeteve piroteknike, sidomos gjatë periudhave festive kur përdorimi i tyre rritet dukshëm.
“Pjesëtarët e FSK-së po prezantojnë shembuj praktikë, rregullat e sigurisë dhe mënyrat se si fëmijët dhe të rinjtë mund të shmangin incidentet që mund të rezultojnë me lëndime të rënda gjatë përdorimit të këtyre mjeteve”, thuhet në njoftim.
FSK thekson se mbetet e përkushtuar ndaj misionit të saj për sigurinë e qytetarëve dhe për ngritjen e ndërgjegjësimit të brezave të rinj rreth çështjeve që ndikojnë në mirëqenien dhe shëndetin publik.
