Sërish është anuluar tenderi për ndërtimin e Stacionit Policor në Zubin Potok.
997 mijë euro është buxheti i paraparë nga Policia e Kosovës për këtë projekt.
Por gjitha ofertat, shkojnë përtej kësaj vlere, çka solli që edhe një herë të anulohet.
Të gjithë tenderët e përgjegjshëm përmbajnë çmime të cilat në mase substanciale e tejkalojnë buxhetin e autoritetit kontraktues për aktivitetin e prokurimit.
Ky institucion i sigurisë të natyrës urgjente e ka vlerësuar edhe furnizimin e kabineteve për vendosje të armëve të gjata.
Këto janë edhe armët më të sofistikuara që ka në përdorim Policia e Kosovës, me të cilat kryen patrullime të përditshme.
Për furnizimin e këtyre kabineteve, vlera e parashikuar është afro 124 mijë euro.
Për sindikatën e Policisë, këto vonesa janë të papranueshme.
“Çdo dështim e pengon punën policore. Dhe bëj apel qe me këto tendere të ketë kujdes, të zyrtarizohen sa më shpejt dhe të ketë sa më pak anulime, për shkak se bie edhe efikasiteti i punës, për shkak se që të gjitha furnizime që na duhen, janë të adresura në tendere, pra janë nevoja për kryerjen e detyrave”, ka thënë Imer Zeqiri nga Sindikata e Policisë së Kosovës.
Sfida me përmbyllje të marrëveshjeve ka edhe për Ministrinë e Mbrojtjes.
E pas gati dy vite në procese tenderuese, e anulim pas anulimi, është arritur marrëveshja për çizme ushtarake për nevoja të Forcave të Sigurisë së Kosovës.
“Mbetet shqetësues fakti që pjesëtarë të Forcave të Sigurisë së Kosovës të mos kenë pajisjet e duhura sikurse janë çizmet, duke marrë parasysh faktin se janë seriozisht në një situatë të rëndë për shkak të aktiviteteve operatoive, dhe sigurisht që pjestëarët e FSK-së, kanë nevojë më shumë se çdo strukturë tjetër që merret me siguri për këto pajisje”, ka deklarua njohësi i sigurisë, Bedri Elezi.
1 milionë e 887 mijë euro kushtuan 8500 palë çizme verore dhe 8500 palë çizme dimërore.
