Përmes një komunikate të publikuar në faqen zyrtare të shtunën pak para mesnate, e që nuk është shpërndarë në profilet e federatës në rrjetet sociale, Federata Shqiptare e Futbollit ka njoftuar se i është drejtuar me letër Federatës së Futbollit të Serbisë për incidentin ndaj klubit shqiptar nga Lugina e Preshevës, Tërnoci.
Tërnoci luan në njërën prej ligave të ulëta të Serbisë, në nivelin e pestë, ndërsa të dielën e kaluar luajti ndaj ekipit të quajtur Mladosti, në qytetin serb Bosilegrad. Policët serbë hynë në zhveshtoren e Tërnocit, ndërsa sulmuan fizikisht lojtarin e kësaj skuadre, Veton Zeqiri, dhe ofenduan të tjerët. Incidentin bëri bujë, ndërsa tashmë ka reaguar FSHF-ja.
Federata Shqiptare e Futbollit në letër ka përmendur faktin që është organizatore me Federatën e Futbollit të Serbisë të Evropianit U21 të vitit 2027. Përmes letrës, FSHF-ja ka shprehur shqetësimin për incidentin e 6 prillit. Sipas Federatës Shqiptare, incidenti ngre pikëpyetje mbi kushtet në të cilat ekipet dhe lojtarët marrin pjesë në gara dhe mund të ndikojë në respektin e ndërsjellë.
“Ndajmë shqetësimin tonë në lidhje me një incident të ndodhur së fundmi me ekipin KF Tërnoci, gjatë ndeshjes së zhvilluar më 6 prill në Luginën e Preshevës. Sipas disa raportimeve mediatike dhe pamjeve filmike të bëra publike, në përfundim të ndeshjes, forcat e policisë kanë hyrë në fushë, kanë ushtruar forcë fizike ndaj të paktën një lojtari, Veton Zeqiri, dhe më pas kanë kryer kontrolle në dhomën e zhveshjes së ekipit, duke kontrolluar edhe sendet personale të lojtarëve. Ky incident ka shkaktuar shqetësim të konsiderueshëm dhe ngre pikëpyetje serioze mbi kushtet në të cilat ekipet dhe lojtarët marrin pjesë në veprimtaritë futbollistike. Situata të tilla jo vetëm që rrezikojnë mirëqenien e të përfshirëve, por mund të ndikojnë edhe në frymën e lojës së ndershme dhe respektit të ndërsjelltë — elemente thelbësore për sportin tonë, sidomos në kuadër të përgatitjeve tona të përbashkëta për UEFA Euro U21 2027”, shkruan në letrën e FSHF-së.
FSHF-ja nuk ka përmendur që Tërnoci është ekip shqiptar, por ka kërkuar që të gjithë, pa dallim, të trajtohen drejtë.
“Ju drejtohemi me mirëkuptim dhe respekt për të kërkuar që Federata e Futbollit e Serbisë të shqyrtojë me vëmendje këtë çështje, të ndihmojë në sqarimin e fakteve dhe, aty ku është e nevojshme, të ndërmarrë hapat e duhur për të garantuar që të gjithë lojtarët dhe ekipet — pa dallim — të trajtohen me drejtësi, dinjitet dhe në përputhje me parimet që përfaqëson sporti ynë”, ka shkruar tutje FSHF-ja.
Federata Shqiptare e Futbollit është në thumb të kritikave që vendosi për organizimin e përbashkët me Federatën e Futbollit të Serbisë të Evropianit të vitit 2027 për futbollistët deri në 21 vjet. Derisa në Serbi nuk ka pasur e nuk ka shumë presion për këtë organizim, në Shqipëri, e sidomos në Kosovë, kritikët janë të zëshëm.
Por vendimi tashmë është zyrtarizuar nga UEFA. Madje presidenti i UEFA-s, Aleksandar Çeferin, e ka lavdëruar këtë organizim të përbashkët.
Ndaj FSHF-së ka pasur kritika edhe për faktin që nuk reagoi pasi flamuri i Kosovës u largua nga Kongresi i UEFA-s në Beograd, javën e kaluar.
Dhe tashmë FSHF-ja ka vendosur të reagojë për sulmin ndaj Tërnocit, ndonëse me gjashtë ditë vonesë dhe me njoftim të lëshuar pak para mesnate. Në sajtin zyrtar të FFK-së nuk ka ndonjë reagim për incidentin e Tërnocit.
