Është bërë përurimi i sistemit të ujësjellësit në fshatin Uglar të Gjilanit. Ky projekt është investim i Komunës bashkë me Qatar Charity. E të kënaqur më gjithë këtë projekt janë banorët e fshatit.
Problemin me ujë të pijshëm nuk do ta kenë më.
Kjo pasi të mërkurën u përurua rrjeti i ujësjellësit në fshatin Uglar të Gjilanit.
E i pari i kësaj komune tha se ky projekt është në bashkëpunim me Qatar Charity.
“Që në takimin e parë më organizatën Qatar Charity të cilët janë tani më miqtë tanë të mirë jemi dakorduar për një partneritet strategjikë me projekte që kanë ndikim shoqëror”, tha Alban Hyseni kryetar i komunës.
Hyseni tregoi edhe vlerën e investimeve në rrjetin e ujësjellësit.
“Vlera e investimit të të gjitha projekteve të reja të ujësjellësit është mbi 1.5 milion euro ku rreth 10 mijë banorë do të kenë ujë të pijshëm nga të gjitha këto projekte”, u shpreh ai.
E drejtori i operacioneve të zhvillimit të Chatar Charity, Abdulaziz Heji shpreson se bashkëpunimi do të vazhdojë edhe më tej.
“Ne shpresojmë që edhe në të ardhmen të bashkëpunojmë të vazhdojmë bashkëpunimin e projekteve në të mirë të qytetarëve”, tha ai.
E të kënaqur me këtë projekt janë edhe banorët e këtij fshati.
“Banorët po ndjehen mirë, është një projekt i mirë, është një punë e mirë që bëhet uji për krejt banorët. Në këtë projekt janë të përfshimë krejt domethënë çdo shtëpi në fshat dhe punët janë tu shku mirë me ujin”, tha Ramiz Isufi, përfaqësues i fshatit.
“Tybe prej mas luftës ky investimi i parë është prej komunës edhe mirë jemi të kënaqur si fshat”, u shpreh Nexhat Halimi – banor
“Të kënaqur jem që ka ardhur uji se edhe s’kena pas ujë, nuk u kanë i pijshëm. Tash me këta diçka ma i mirë”, tha banori Mustafë Ibrahimi.
Kronika e realizuar nga Fëllënza Krasniqi
