Futbollisti dardan, Lirim Kastrati solli moment paniku në ndeshjen e skuadrës së tij Ujpest ndaj Kecskemet të zhvilluar të dielën në kuadër kampionatit hungarez. Kastrati humbi ndjenjat në fushën e lojës për t’u dërguar më pas në spital.
Gjithçka ndodhi në pjesën e parë pas një përplasjeje mes Kastratit dhe Valentin Hadaro që solli edhe humbjen e ndjenjave të futbollistit i cili e mori veten dhe shprehu dëshirën për të vijuar lojën.
Por ai shfaqi sërish probleme dhe në fund e la fushën e lojës duke u zëvendësuar nga Krisztian Simon. Por edhe në stol gjendja e Lirim Kastratit nuk ishte e mirë dhe humbi sërish ndjenjat për t’u dërguar me urgjencë në spital. Sipas stafit mjekësor të skuadrës së Ujpestit, Kastrati nuk ka pësuar dëmtim të rëndë, por ai u dërgua në spital pasi dyshohet për tronditje.
Në fund, futbollistët e Ujpestit morën fanellën e Kastratit dhe me të bënë një fotografi, sa për t’ia përcjell edhe atij një mesazh solidarizimi, ndërkohë që ndeshja përfundoi me fitoren e Ujpestit 3-0.
