Ministria e Punëve të Jashtme të Francës i është përgjigjur pyetjeve lidhur me heqjen e vizave për qytetarët e Kosovës, të cilën e ka publikuar në faqen e saj.
Pavarësisht rekomandimeve të Komisionit Evropian, kosovarët nuk kanë qasje në vizën Shengen. Sipas Prishtinës, Franca është një nga vendet që po e ngadalëson këtë proces. Pse është ajo? A do të trajtohet kjo temë në Samitin BE-Ballkani Perëndimor, ka qenë pyetja drejtuar kësaj ministrie.
Ndërsa në përgjigje thuhet se “Takimi i 23 qershorit i liderëve Bashkimi Evropian-Ballkani Perëndimor do të jetë një mundësi për të diskutuar mundësinë e vendeve në rajon për të përmbushur perspektivën e tyre evropiane, ndër temat e tjera. Për sa i përket liberalizimit të vizave për Kosovën, kjo çështje është pjesë e udhërrëfyesit që është miratuar nga Bashkimi Evropian, i cili përfshin një sërë kushtesh që duhet të përmbushen efektivisht në afat të gjatë”.
Kosova është vendi i vetëm në Ballkanin Perëndimor, qytetarët e së cilës nuk gëzojnë të drejtën e lëvizjes së lirë në zonën e Shengenit.
