Franca, Gjermania dhe Britania e Madhe në një thirrje të përbashkët kanë dënuar të mërkurën bllokadën e vazhdueshme izraelite të ndihmës humanitare në Gaza, duke kërkuar që menjëherë të rifillohet me shpërndarje të pakufizuar të ndihmave dhe për një ripërtrirje të armëpushimit.
“Izraeli tani ka bllokuar plotësisht hyrjen e ndihmave humanitare në Gaza për më shumë se pesëdhjetë ditë,” thanë ministrat e jashtëm në një deklaratë, duke paralajmëruar për pasoja të tmerrshme për popullatën palestineze.
“Furnizimet thelbësore ose nuk janë më të disponueshme ose mbarojnë shpejt. Civilët palestinezë – duke përfshirë një milion fëmijë – përballen me një rrezik akut të urisë, sëmundjeve epidemike dhe vdekjes. Kjo duhet të marrë fund.”
Duke bërë krahasimin me gjendjen e mëparëshme ku ndihma së paku ishte në gjendje të jepej nga OKB-ja dhe OJQ-të ndërkombëtare, situatën e tanishme të bllokimit total, ministrat e përshkruajnë si “të patolerueshme”.
Ata shprehën gjithashtu mosmiratim të fortë për vërejtjet e fundit të ministrit izraelit të Mbrojtjes, Israel Katz dhe planet që sugjeronin një prani të zgjatur izraelite në Gaza pas luftës.
“Komentet e fundit të ministrit Katz që politizojnë ndihmën humanitare dhe planet izraelite për të qëndruar në Gaza pas luftës janë të papranueshme – ato dëmtojnë perspektivat për paqen.
Ndihma humanitare nuk duhet të përdoret kurrë si një mjet politik dhe territori palestinez nuk duhet të zvogëlohet apo t’i nënshtrohet ndonjë ndryshimi demografik. Izraeli është i detyruar sipas ligjit ndërkombëtar të lejojë kalimin e papenguar njerëzor.”
Zemërimi u shpreh edhe për sulmet izraelite që kanë shënjestruar personelin humanitar dhe mjekësor dhe infrastrukturën, raporton Anadoly.
“Ne përsërisim zemërimin tonë ndaj sulmeve të fundit nga forcat izraelite ndaj personelit humanitar, infrastrukturës, objekteve dhe objekteve të kujdesit shëndetësor”, thuhet në deklaratë.
Deklarata përfundoi me një thirrje të ripërtërirë për t’i dhënë fund armiqësive dhe një zgjidhje politike gjithëpërfshirëse.
Që nga 2 marsi, Izraeli ka mbyllur kalimet e Gazës, duke bllokuar të gjitha llojet e furnizimeve që të hyjnë në enklavë.
Që nga fillimi i luftës në tetor 2023, lufta e Izraelit në Gaza ka vrarë më shumë se 51,000 palestinezë në enklavë, shumica prej tyre gra dhe fëmijë.
