Formacioni që fiton nuk ndryshon. Do të dukej e pakuptimtë që trajneri i Shqipërisë, Sylvinho, të hynte në aventurë me ndryshime në 11-shen që do të hedhë në fushë në sfidën me Moldavinë, teksa SuperSport ka mësuar tashmë edhe formacionin me të cilin do të nisë “finalen” e së premtes.
Rezultatet e deritanishme kanë treguar që vendimet e deritanishme kanë qenë të goditura, skuadra ka pasur ekuilibër në të dyja fazat e lojës dhe ç’është më e rëndësishmja, rezultatet kanë qenë spektakolare.
Konfirmohet në portë titullar Etrit Berisha, i cili u shfaq i jashtëzakonshëm edhe në sfidën e fundit në Serinë A, në fitoren 0-1 të Empolit në fushën e Napolit.
Rikthehet në formacion në qendër të mbrojtjes Ardian Ismajli, i cili mungoi për arsye dëmtimi ndaj Çekisë. E zëvendësoi në mënyrë të përkryer Arlind Ajeti, që, fatkeqësisht, s’është në këtë grumbullim për arsye fizike. Edhe nëse do të ishte i gatshëm, vështirë se Sylvinho do ta linte në stol mbrojtësin e Empolit.
Nuk ndryshon asgjë në pjesën tjetër të formacionit: Hysaj e Mitaj, në krahët e prapavijës, Ramadani e Asllani para mbrojtjes, nga krahët Asani e Seferi dhe Bajrami pas sulmuesit të avancuar, Sokol Cikalleshi.
