Në skenën politike të Kosovës po formohet një subjekt i ri politik me emrin Forca e Re Kombëtare (FRK), iniciuar nga Dr. Ferid Agani dhe Fatmir Smajli, kryetar i Grupit Politik “Integriteti”.
Sipas një komunikate për media, më 14 dhe 17 korrik janë mbajtur mbledhjet konstitutive të Këshillit Organizativ, ku morën pjesë figura nga jeta publike, akademike e politike, si dhe qytetarë të interesuar për një alternativë të re politike.
Gjatë kësaj mbledhje të mbajtur u miratuan disa vendime kyçe:
- Miratimi i Rregullores së Punës së Këshillit,
- Zgjedhja e kryetarit të Këshillit dhe strukturave drejtuese,
- Emërimi i përfaqësuesit ligjor për paraqitje në KQZ,
- Vendimi për krijimin e grupeve të punës që do të hartojnë Statutin, Programin Politik, Platformën Ideologjike dhe strategjitë për komunikim dhe fushatë.
Ndër vendimet më të rëndësishme ishte miratimi i Deklaratës Politike, që përqafon vlera si familja, tradita, morali, identiteti kombëtar dhe liria individuale, të gjitha në kuadër të rendit kushtetues dhe demokratik.
Po ashtu në komunikat është bërë e ditur se Partia e Drejtësisë është bashkuar me grupin politik “Integriteti”, duke synuar formimin e një subjekti të përbashkët që ndërthur përvojën 25-vjeçare të saj me vizionin e ri të partnerëve.
