‘Shtatë përqind do të jenë të ardhurat që do të arkëtohen në fondin e sigurimeve shëndetësore, ku 3.5 për qind do të jetë nga paga e qytetarëve dhe 3.5 për qind nga punëdhënësi’, ka thënë Ministri i Shëndetësisë, Arben Vitia, në konferencën për media, pas mbledhjes së Qeverisë ku u miratua projektligji për Sigurimin e Detyrueshëm Shëndetësor.
“Kostoja shtesë për qytetarët do të jetë një mbledhje e kontributeve shtesë në emër të solidaritetit që ti shtohet buxhetit për shëndetësi. Të gjitha këto investime që i keni pa kohëve të fundit do të marrin shtysë edhe më shumë me këto fonde. Në këtë drejtim shtatë për qind do të jenë të ardhurat që do të arkëtohen në fondin e sigurimeve shëndetësore, ku 3.5 për qind do të jetë nga paga e qytetarëve dhe 3.5 për qind nga punëdhënësi”, tha ai.
Vitia, uroj që kjo marrëveshje të procedohet sa më shpejt në Kuvend në mënyrë që të fillohet me investimet.
“Dhe shpresojmë shumë që në Parlamentin e Republikës së Kosovës do të procedohet sa më shpejt kjo marrëveshje dhe sapo do të votohet do të vazhdojmë me investimet”, ka shtuar Vitia
Ndërkaq, ministri i Financave, Hekuran Murati, ka thënë se përcaktimi i pagës minimale në nivelin 350 euro është parë si një hap i domosdoshëm pas konsultimeve dhe takimeve që kanë zhvilluar me komunitetin e biznesit dhe me punëtorët.
“Nga konsultimet dhe takimet që kemi pasur ndërkohë gjatë këtyre dy viteve është parë që niveli prej 264 eurove sa ka qenë tashmë është vjetruar dhe sidomos gjatë vitit 2022 dhe 2023 që kanë ndodhur shumë zhvillime të ndryshme sepse duhet të merret parasysh përveq kostos së jetesës edhe niveli i punësimit. Konsideroj që në nivel të konsultimeve në baza ditore që kemi edhe me komunitetin e biznesit por edhe me punëtorët, ky hap pra përcaktimi i nivelit 350 euro është një hap i domosdoshëm dhe i nevojshëm në mënyrë që të bëjmë atë kapërcimin që tashmë një dekadë ka qenë i pamundur”, ka theksuar ai.
Po ashtu, Murati, ka treguar se janë duke u munduar vazhdimisht që të gjejnë mënyra sesi mund të rritet edhe niveli i pensioneve.
“Jemi duke punuar në vazhdimësi qoftë edhe në kuadër të reformës pensionale që po e përgatisim pra që të gjejmë mënyra sesi mund të rritet edhe niveli i pensioneve por edhe të krijohet një sistem i qëndruëshëm afatgjatë”, ka thënë Murati./teve1.info/