Zhdëmtimi i viktimave në rastet që trajtohen nga Gjykata Speciale, përpos atij që shpallet fajtor, kërkohet t’i ngarkohet si barrë edhe shtetit të Kosovës.
Në rastin e Salih Mustafës, trupi gjykues kërkoi nga institucionet e Kosovës, gjegjësisht nga Ministria e Drejtësisë dhe Qeveria e Kosovës, që ta krijojnë një fond të tillë.
Por një kërkesë të tillë, në formë zyrtare ende nuk e ka pranuar Qeveria.
“Nuk kemi pranuar ndonjë kërkesë me shkrim që lidhet me krijimin e këtij fondi”, ka thënë zëdhënsi i Qeverisë, Përparim Kryeziu
Ndërkohë, edhe përgjatë zhvillimit të procesit ndaj Mustafës, Ministria e Drejtësisë ishte shprehur se nuk mund të krijohet një fond i veçantë, duke u thirrur në fondin ekzistues.
Njëjtë ka vepruar edhe pas kërkesës publike të trupit gjykues.
“Sa i përket çështjes së kompensimit të viktimave të krimit, ju lutem t’i referoheni Ligjit për kompensimin e viktimave i cili parasheh veprat të cilat kompensohen si dhe procedurat e kompensimi”, thuhet nga MD.
Të panevojshëm krijimin e një fondi të veçantë kompensimi e sheh edhe Anton Nrecaj nga Instituti CLARD.
Vlera e kompensimit të 8 viktimave në rastin e Salih Mustafës është 207 mijë euro.
Kronika e realizuar nga gazetarja Florijeta Dernjani