Lëvizja FOL ka publikuar të dhënat nga monitorimi i zbatimit të aktiviteteve të parapara nga Qeveria në kuadër të Planit Kombëtar për Zhvillim, për periudhën e parë gjashtë mujore të këtij viti.
Sipas gjetjeve Qeveria e Kosovës, nga 147 aktivitete të parapara për t’i realizuar në këtë periudhë, ka realizuar vetëm 33% prej tyre, ndërsa 40% e aktiviteteve kanë mbetur të parealizuara.
“Qeveria e Kosovës nga 147 aktivitete të parapara t’i realizojë gjatë periudhës janar-qershor 2024 ka arritur t’i realizojë vetëm 49 prej tyre apo 33%. Ndërkaq, 59 aktivitete apo 40% e tyre kanë mbetur të parealizuara”, ka thënë drejtoresha e FOL-it, Mexhide Demolli.
Ajo ka theksuar se për 27% të aktiviteteve kanë munguar të dhënat sepse nuk kanë marrë përgjigje nga tri ministri, ajo e Mjedisit, Planifikimit Hapësinor dhe Infrastrukturës, Ministria e Financave dhe Ministria e Kulturës, Rinisë dhe Sportit.
Për këtë, Demolli ka bërë të ditur se FOL-i ka bërë ankesë në Agjencinë për Informim dhe Privatësi dhe se janë në pritje të “realizimit të së drejtës për të pasur qasje në këto të dhëna”.
Demolli ka deklaruar se përveç tri ministrive që nuk janë përgjigjur, katër ministri të tjera nuk kanë pasur asnjë aktivitet të planifikuar për periudhën e parë të këtij viti.
