Tash e disa javë, i vetmi mjet për ngrohje të klasës është kjo nxehëse elektrike.
Nxënësit e shkollës profesionale “Minatori” në Fushë Kosovë janë duke mësuar në këto kushte meqenëse ngrohtorja e shkollës nuk është duke funksionuar.
E gjithë kjo pasi kaldaja është prishur ndërsa tenderi për rregullimin e ngrohtoreve të shkollave të Fushë Kosovës ka përfunduar në Organin Shqyrtues të Prokurimit.
Mësimi në temperatura të ulëta po u vështirëson mësimin nxënësve.
“Ftohtë po është, nxehjet i kanë sjellë disa prindër por ato janë të vogla dhe nuk po kryejnë punë dhe fokusimi po është i dobët të na”, tregoi nxënësi Median Balaj.
“E vështirë boll se po duhet me qëndro me jakne, nxemja e vogël nuk po nxeh boll nuk po mundemi me koncentru në mësim”, tha Elijon Sahiti.
E edhe më të vështirë po e bënë mësimi në orët e fundit të pasdites.
“Me koncentru po e kemi të vështirë pasi nganjëherë po është shumë ftohtë sidomos orët e fundit kur po bjen shi a naj sen nuk është që po mundemi mu koncetru aq shumë”, tha Blendona Buzhala.
Në këtë objekt, paradite mësojnë nxënësit e shkollës ekonomike “Hoxhë Kadri Prishtina” kurse pasdite nxënësit e shkollës profesionale “Minatori”.
Në secilën klasë janë vendosur këto pajisje për ngrohje, madje të njëjta janë edhe në korridore.
E për shkak të këtyre problemeve tash e dy javë mësimi është duke u mbajtur me orar të shkurtuar.
“Kaldaja është prishur, kanë ardhur mjeshtri e kanë kontrolluar ka thënë që nuk ndreqet duhet ë zëvendësohet e re, kërkesë kemi bërë bashkë edhe me shkollën “Hoxhë Kadri Prshtina” pasi ne jemi dy shkolla në një objekt, tash ka mbetur në Organin Shqyrtues të Prokurimit. Është fat i mirë që ende nuk është shumë ftohtë me do nxehëse nëpër klasa, se ndodhsha me qenë shumë ftohtë detyrohemi edhe te ndërpremë edhe mësimi”, deklaroi drejtori i shkollës profesionale “Minatori”, Rexhel Berisha.
Televizioni ka provuar të kontaktojë edhe zyrtarë nga drejtoria e arsimit por nga kjo drejtori në Fushë Kosovë, nuk kanë qenë të qasshëm gjatë ditës.
