Sulmuesi i Anglisë, Phil Foden i ka dalë në mbrojtje trajnerit Gareth Southgate që po kritikohet shumë për paraqitjen e ekipit të tij në “Euro 2024”.
Anglia është kualifikuar në çerekfinale të Evropianit por nuk ka treguar paraqitje të mira, ndërsa në këtë fazë do të përballet me Zvicrën.
Foden ka thënë se lojtarët duhet të marrin përgjegjësinë për paraqitjet e dobëta të Anglisë dhe jo trajneri Southgate për të cilin ndihet keq duke pasur parasysh kritikat e drejtuara ndaj tij.
“Lojtarët duhet të marrin fajin për paraqitjet e dobëta. Duhet të ketë një lider të bëjë një gjë të tillë dhe të gjej zgjidhje se çka nuk po funksionon brenda ekipit. Trajneri nuk ka faj pasi ai merret me sistemin e lojës dhe stërvitjet, që lojtarët duhet ti zbatojnë në fushë”, është shprehur Foden.
24-vjeçari që është shpallur lojtari më i mirë i sezonit të fundit në Premier League nuk ka treguar paraqitje të mira në Evropian.
Foden këtë e ka parasysh dhe ka insistuar se do të mundohet ta ndihmoj ekipin për të shkuar sa më larg në këtë turne.