Përzgjedhësi i Kombëtares së Kosovës, Franco Foda ka pranuar se pret ndeshje të vështirë kundër Hungarisë.
Ndeshja miqësore mes Hungarisë dhe Kosovës, luhet të martën prej orës 19:00 në stadiumin “Puskas Arena” në Budapest. Në konferencën për shtyp të mbajtur të hënën, Foda ka thënë se Kosova duhet të përballet me kundërshtar të nivelit të Hungarisë, e cila është kualifikuar në “Euro 2024”.
Ai ka shtuar se pavarësisht forcës së Hungarisë, Kosova do të paraqitet me vetëbesim të madh në fushë. Kosova në këtë miqësore futet pas fitores në Yerevan 1:0 ndaj Armenisë javën e shkuar.
“Kemi zhvilluar një ndeshje shumë të mirë me Armeninë. Kemi një skuadër që ka kualitet të mirë teknik dhe lojtarët janë shumë të mirë në tranzicion, megjithatë do të jetë e vështirë të luajmë ndaj një skuadre të fortë si Hungaria që ka shumë kualitet”, është shprehur Foda. “Ne duhet të përballemi me skuadra të nivelit të Hungarisë, që është kualifikuar në Kampionatin Evropian sepse edhe synimi ynë është të kualifikohemi. Pavarësisht, sa kombëtare e fortë është Hungaria, ne do të luajmë me vetëbesim”.