Selektori i Kombëtares së Kosovës në futboll, Franco Foda insiston se “Dardanët” duhet patjetër të ngjiten në Ligën B të Ligës së Kombeve.
E për ta bërë një gjë të tillë, Kosova duhet ta mposht Islandën në ndeshjet e play-offit të kësaj gare.
Foda beson se Kosova mund t’ia dalë mbanë dhe për këtë arsye kërkon fitore në të dyja përballjet me Islandën.
Në konferencën për shtyp të mbajtur të mërkurën pasdite, një ditë para ndeshjes së parë me Islandën, Foda zbuloi arsyen se pse insiston se duhet të ngjiten në Ligën B.
Kosova deri më tani ka luajtur në Ligën D dhe Ligën C të Ligës së Kombeve, ndërsa promovimin në Ligën B po e synon ndaj Islandës.
“Është e rëndësishme të ngjitemi në Ligën B. Ka dallim Liga B dhe Liga C. Ka kundërshtarë më të fortë dhe duhet të ngrihemi për t’u përballur me kundërshtar të tillë. Duhet të luajmë lojë intensive nga minuta e parë në ndeshjen ndaj Islandës”, ka tha Foda.
Selektori Foda insistoi se atmosfera brenda ekipit është e mirë, ndërsa shtoi se shpreson që t’i ketë në dispozicion Valon Berishën e Amir Rrahmanin, që ende nuk janë rikuperuar plotësisht.
Po ashtu, Foda foli edhe për Islandën, të cilën e vlerësoi lart.
“Valon Berisha e Amir Rrahmani janë në fazën e rikuperimit dhe uroj ti kemi të gjithë lojtarët në dispozicion. Islanda është kundërshtare që luan lojë taktike, por ne duhet të luajmë ndaj Islandës të përqendruar nga fillimi. E dimë se Islanda ka edhe lojtarë të mirë individual. Ne duhet t’i zbatojmë detyrat tona. Ne kemi dy ndeshje për t’i fituar. Të dyja janë të rëndësishme dhe duhet të fitojmë për të kaluar në Ligën B”, u shpreh Foda.
Promovimin në Ligën B të Ligës së Kombeve po e synon edhe Milot Rashica, i cili insistoi se “Dardanët” do të dalin në fushë për ta mposhtur Islandën në të dyja përballjet.
“Do të jenë dy ndeshje të rëndësishme për ne dhe synojmë fitore për të provuar edhe ne paraqitjen në Ligën B. Ndeshjet ndaj Islandës do të jenë ndryshe nga ato që i kemi luajtur”, ka thënë Rashica.
Dueli i parë ndërmjet Kosovës dhe Islandës, luhet të enjten prej orës 20:45 në stadiumin “Fadil Vokrri” në Prishtinë kurse ndeshja e dytë është të dielën dhe zhvillohet në Spanjës.
Kosova ishte e dyta në Grupin C2 të Ligës së Kombeve, ndërsa Islanda e treta në Grupin B4.
Ky do të jetë ballafaqimi i parë i Kosovës me Islandën që nga viti 2017.
Kosova i ka dy humbje përball Islandës në kualifikimet për Kampionatin Botërorin të vitit 2018.
