Aktivistët në një flotilje që kërkojnë të thyejnë bllokadën izraelite të Gazës thanë të mërkurën se disa nga anijet e tyre u sulmuan nga dronë në jug të Greqisë , duke bërë që Spanja dhe Italia të dërgojnë anije të marinës për shpëtime të mundshme.
Flotilla Globale Sumud tha se u sulmua gjatë natës nga “dronë të paidentifikuar dhe bllokime komunikimi”. Tha se “të paktën 13 shpërthime” u dëgjuan në dhe përreth disa anijeve të flotiljes, ndërsa dronët ose avionët hodhën “objekte të paidentifikuara” në të paktën 10 anije.
Nuk u raportuan viktima, por pati dëme në anije dhe “pengesa të përhapura në komunikim”, shtoi ajo
Italia e dënoi sulmin dhe aktivizoi një fregatë të marinës për të qenë në gatishmëri për operacione të mundshme shpëtimi, tha Ministri Italian i Mbrojtjes, Guido Crosetto, raporton AP.
Crosetto tha se fregata Fasan po shkonte drejt zonës nga pozicioni i saj në veri të Kretës “për operacione të mundshme shpëtimi”. Italia e ka informuar Izraelin për vendimin.
Kryeministri spanjoll, Pedro Sánchez tha se Spanja do të dërgojë gjithashtu një anije patrullimi për të ndihmuar flotiljen ose për të kryer një operacion shpëtimi.
“Qeveria spanjolle kërkon që të respektohet e drejta ndërkombëtare dhe të respektohet e drejta e qytetarëve tanë për të lundruar në mënyrë të sigurt në Mesdhe”, tha Sánchez të hënën në Nju Jork.
