Boksieri shqiptar i kategorisë velter Florian Marku do të përballet me britanikun Chris Kongo në mars të këtij viti, raporton “Sky Sports”.
Dy boksierët janë pajtuar të përballen mes vete.
Ata kishin pasur një konfrontim mes vete në një konferencë për media në gusht të vitit të kaluar.
“Ai donte që ta shihnin njerëzit. E dija se e donte këtë përballje. Unë i thashë atij ‘së pari mposhti ata që të kanë mposhtur’ e më pas eja të flasim. Ai nuk po largohej dhe unë e shtyva”, ka sqaruar Marku.
Marku në boksin profesionist ka 13 fitore (8 KO) dhe një barazim.
Meçin e fundit ai e zhvilloi në shtator të vitit të kaluar, kur e nokautoi irlandezin Dylan Moran qysh pas 54 sekondave.
Chris Kongo ka 14 fitore e dy humbje. Ai humbjen e fundit e regjistroi në janar të vitit të kaluar. U mposht me pikë pas 12 rundeve nga Ekow Essuman në luftën për disa tituj, përfshirë edhe IBF European dhe WBC International.
“Ai, siç është temperament, më shtyu. Mund të vinte te një përleshje, por sigurimi ndërhyri. Jam i entuziazmuar që është arritur dakordimi për të boksuar. Kjo është ajo që doja, kjo është ajo që donin tifozët dhe do t’ua ofrojmë këtë. Është meç i mirë. Tash ai nuk ka se ku të shkojë. Ai duhet të luftojë me mua apo me këdo në Top 10 të Britanisë”, ka thënë Kongo. “Është mirë të ndeshet me mua tash, pasi kemi ndërtuar një raport”.
Por, Marku ka një paralajmërim për Kongon: “Ai do të pendohet. Do të pendohet që zgjodhi të përballet me mua”.
Marku thotë se do të jetë në formën më të mirë kur të vijë momentin i meçit.
“Ëndrra e tij u realizua. E di se ai do të stërvitet shumë për këtë përballje, pasi është përballja më e rëndësishme në jetën e tij deri më tash. Por, unë për çdo meç stërviti sikur të jetë më i rëndësishmi në jetën time dhe ai do ta kuptojë këtë”, tha Marku.
Promotori Ben Shalom ka thënë se është momenti që Marku të dëshmojë se është forcë në kategorinë velter.
“U bë aq personale dhe ka kuptim të organizohet ky meç. Floriani është boksier shumë, shumë i talentuar. Me punën që ka bërë me trajnerin Grant Smith, tash dua që të dëshmojë se nuk është vetëm figurë kulti”, ka thënë Shalom. “Kemi një Florian Marku të pjekur me një trajner fenomenal, dhe është të dëshmojë se është kërcënim serioz për kategorinë dhe meçi me Chris Kongon do ta dëshmojë këtë. Floriani duhet ta dëshmojë veten. Do të jetë meç i madh. Floriani në anën tjetër i ka dhënë Chris Kongos rastin dhe Chris duhte të fokusohet. Është një meç me peshë të madhe për të dy”.
