Gazetari Florent Zeqaj ka thënë se përplasjet e kryeministrit në detyrë, Albin Kurti, me Shtetet e Bashkuara nuk janë të reja, por datojnë që nga koha e luftës në Kosovë.
Sipas Zeqajt, qasja e Kurtit ka qenë kundër marrëveshjeve që përkrahnin liderët amerikanë, duke përmendur rastin e Rambujesë.
“Albin Kurti përplasjen me Amerikën e ka qysh në vitin 1999. Kurti ka qenë kundër Clintonit në atë kohë, Albright. Po flas me qasjen e tij që e ka pas, s’po flas individualisht, por qasjen e ka pasur. Kurti ka qenë kundër çdo marrëveshje që arrihet në Rambuje. Në atë kohë, Clinton e Albright kanë punuar në atë drejtim, që së fundmi më së miri na dëshmoi dëshmia e Rubinit. Adem Demaçi e ka kallu se kush është Albin Kurti dhe pse i ka prish punët me të. Për Kurtin as Adem Demaçi nuk ka qenë ‘burrë i mirë’”, ka thënë Zeqaj në emisionin “Këndi i Debatit” në Tëvë1.
Ai shtoi se dyshimet dhe përplasjet e Kurtit me ShBA vazhduan edhe në vitet 2006–2008, kur sipas tij, ai nuk besonte shpalljen e pavarësisë së Kosovës.
“Problemet vazhdojnë prapë në vitin 2006, 2007, 2008, kur Kurti nuk e beson që Kosova ka me shpall pavarësinë. Në një formë përplaset dhe konfrontohet edhe me ish-presidentin Xhorxh Bush. Nuk i besoje deklaratës që Kosova do të shpallet e pavarur. Përplasjet vazhdojnë edhe me Jacobson”, theksoi ai.
Zeqaj tha se pezulimi i dialogut strategjik Kosovë–ShBA është “kupa e mbushur” e këtyre raporteve të tensionuara ndër vite./teve1.info/
