Futbollisti i Kombëtares së Kosovës, Florent Hasani mund të largohet nga futbolli rumun pas një viti për t’u rikthyer në Kategorinë Superiore të Shqipërisë.
Mësohet se gjasat janë të mëdha që Hasani muajin tjetër të transferohet te Paritizani i Tiranës.
Mediumet e Shqipërisë raportojnë se palët tashmë kanë nisur negociatat dhe marrëveshja mund të finalizohet së shpejti, pasi edhe Hasani është i gatshëm të largohet nga Rapidi i Bukureshtit për shkak se nuk është i kënaqur me minutazhën e tij.
Në 14 ndeshje kampionale këtë sezon, Hasani ka shënuar 1 gol dhe 1 asistim ndërsa ka kontratë deri në vitin 2026 me Rapidin, ekip të cilit iu bashkua në fillim të këtij viti për 300 mijë euro.
Te Partizani po e shohin Hasanin si përforcim të duhur për sulmin, pasi 27-vjeçari ka luajtur për skuadrën e Tiranës përpara se të zhvendoset në Rumani.
Hasani ka bërë karrierë edhe në Hungari e Izrael, ndërsa në Kosovë ka qenë pjesë e Trepçës ’89 dhe Vushtrrisë.
Gjithashtu, Hasani ka edhe 8 paraqitje dhe 1 gol të shënuar me Kombëtaren e Kosovës.
