Barcelona do të duhet të përballet pa yllin Lamine Yamal në sfidën e së dielës ndaj Valencias. Trajneri i katalanasve, Hansi Flick, konfirmoi se sulmuesi 18-vjeçar nuk është gati për lojë për shkak të një dëmtimi në zonën pubike.
Klubi blaugrana njoftoi në një komunikatë të shkurtër se Yamal nuk ka marrë pjesë në stërvitjet e skuadrës pas rikthimit nga detyrat me Kombëtaren spanjolle dhe për këtë arsye nuk do të jetë në dispozicion për ndeshjen e radhës në La Liga.
Flick nuk e fshehu pakënaqësinë e tij ndaj mënyrës si u menaxhua lojtari nga stafi i Spanjës. “Ai nuk do të jetë i gatshëm. Shkoi të luajë për Spanjën me dhimbje dhe nuk stërviti fare. Ata i dhanë qetësues vetëm që të luante,” tha gjermani. “Në të dyja ndeshjet kishin epërsi prej të paktën tre golash, megjithatë ai luajti 73 dhe 79 minuta. Midis ndeshjeve nuk mundi as të stërvitej. Kjo nuk është kujdes për lojtarin. Jam shumë i zhgënjyer.”
Një afat për rikthimin e Yamal ende nuk është përcaktuar, duke shtuar shqetësimet e Barcelonës që e sheh adoleshentin si lojtar kyç për sezonin aktual.
Yamal, kandidat i fortë për Topin e Artë këtë vit, ka nisur sezonin në formë të shkëlqyer me dy gola dhe dy asistime në tre ndeshje të La Ligas. Po ashtu, gjatë pauzës ndërkombëtare kontribuoi me tre asistime në fitoret e thella të Spanjës ndaj Bullgarisë dhe Turqisë – rezultate që sipas Flick vetëm sa e bëjnë edhe më të pakuptimtë ekspozimin e tepërt të lojtarit.
Mungesa e tij është një goditje e rëndësishme për Barcelonën, që tashmë duhet të gjejë alternativa për të mbajtur ritmin në garën për titullin në La Liga.
