Nga viti 2023, fotografia e presidentes së shtetit, Vjosa Osmani dhe flamuri i Kosovës qëndruan në ballë të zyrave.
Por me ardhjen në pushtet të Listes Serbe në katër komunat veriore, ato u lëvizën.
Në këtë fotografi që e ka siguruar televizioni, shihet se kryetari i ri i Zubin Potokut, Millosh Peroviq ia ka ndryshuar vendin.
Fotografia e të parës së shtetit nuk u pa as në një postim të publikuar nga kryetari i Komunës së Mitrovicës, Milan Radojeviq.
Por asamblistja e Vetëvendosjes atje, Aida Ferati Doli thotë se flamuri është i vendosur brenda institucionit dhe zyrës së kryetarit.
Që simbolet shtetërore janë në vendin e tyre e thotë edhe ministri në detyrë i Administrimit dhe Pushtetit Lokal, Elbert Krasniqi.
Krasniqi ka thënë se transferimi i pushtetit në këto komuna është realizuar në pajtim me Kushtetutën e Republikës së Kosovës dhe me legjislacionin në fuqi për vetëqeverisjen lokale.
“Ministria e Administrimit të Pushtetit Lokal (MAPL), konform mandatit të saj, ka monitoruar mbledhjet inaugurale në komunat Mitrovicë e Veriut, Leposaviq, Zubin Potok dhe Zveçan. Transferimi i pushtetit në këto komuna është realizuar në pajtim me Kushtetutën e Republikës së Kosovës dhe me legjislacionin në fuqi për vetëqeverisjen lokale. Në komunikimin zyrtar dhe jozyrtar që MAPL ka zhvilluar, është konstatuar se kryetarët e komunave Mitrovicë e Veriut, Leposaviq, Zubin Potok dhe Zveçan, në zyrat e tyre, i kanë të vendosura flamurin e Republikës së Kosovës dhe fotografinë e Presidentes së Republikës së Kosovës”, ka thënë Krasniqi.
Edhe burime brenda komunës së Zvecanit thonë se flamuri gjendet ende në zyrën e kryetarit po që nuk dihet a i është ndryshuar vendi.
