Ndeshja e kualifikimeve për Kupën e Botës 2026 ndërmjet Serbisë dhe Anglisë, e zhvilluar të martën në mbrëmje në stadiumin “Rajko Mitic” në Beograd, u shoqërua me skena të dhunshme në tribuna.
Policia e trazirave u detyrua të ndërhynte me shpejtësi pasi tifozët serbë u përleshën mes vete, duke shkaktuar panik tek fëmijët dhe familjet e pranishme. Raportohet se incidentet ndodhën në pjesën e dytë të lojës, në momentin kur nga tribunat u dëgjuan thirrje drejtuar presidentit Aleksandar Vuçiç, ndërsa disa huliganë shpalosën flamuj të Serbisë mbi hartën e Kosovës.
Situata u përkeqësua më tej kur Ezri Konsa dhe Reece James u shënjestruan me lazer nga tribuna, duke detyruar gjyqtarin të ndalë përkohësisht ndeshjen. Gazetari i ITV, Gabriel Clarke, e përshkroi incidentin si “shqetësues për disa minuta”, ndërsa ish-portieri i Anglisë, Paul Robinson, tha se Konsa u godit drejtpërdrejt në sy nga lazeri.
Pavarësisht tensioneve, ndeshja vazhdoi dhe përfundoi me fitoren e thellë 5-0 të Anglisë. Golat për “Tre Luanët” i shënuan Harry Kane, Noni Madueke, Ezri Konsa, Marc Guehi dhe Marcus Rashford nga penalltia
Ndeshja u luajt në prani të një numri të reduktuar të shikuesve, pasi Serbia ishte ndëshkuar më herët për sjellje raciste të tifozëve në ndeshjet e kualifikimeve. Megjithatë, incidentet e mbrëmshme nxorën në pah problemet e vazhdueshme me huliganizmin në futbollin serb.
