Nga 11 janari deri më 31 janar, qyteti i Gjilanit zhvillon festivalin kulturor të njohur si Flaka e Janarit, festivale të cilat mbahet në kujtim të heronjëve të Kosovës.
E këtë të shtunë u zhvillua “Akademia e Flakës” kushtuar masakrës së Reçakut, në të cilën kryeministri në detyrë, Albin Kurti kujtoi fillimet e këtij festivali.
“Flaka e Janarit si fillim nisi si shënim i 10-vjetorit të vrasjes së tre veprimtarëve politikë dhe patriotëve të paepur, Jusuf dhe Bardhosh Gërvalla dhe Kadri Zeka, të vrarë më 17 janar 1992 në Gjermani nga shërbimi sekret. Rreth këtij festivali u përbashkua kujtimi për rënien e Rexhep Malajt dhe Nuhi Berishës, të vrarë nga policia jugosllave më 11 janar 1984 në Prishtinë”, deklaroi Kurti.
Ndërkaq, historiani Sylë Ukshini u shpreh se pas rënies së Millosheviqit, elitat shtetërore të Serbisë bënë përpjekje për të mbajtur larg të gjitha provat për gjenocid.
“Mospranimi i krimeve nga regjimet e mëparshme i lë regjimit pasardhës të ndjekë objektivat gjeopolitike të papërfunduara që pararendësi i tij nuk arriti t’i realizojë, me gjithë krimet e kryera njerëzore. Në këtë kuadër, Kosova si shtet i vogël i ri duhet të tregohet më i përgatitur për t’i treguar botës se kush ishte fajtori e kush viktima, duhet ta përsërisë vazhdimisht”, tha ai.
I pranishëm në këtë ngjarje ishte paraparë të ishte edhe ish-shefi i Misionit Verifikues të OSBE-së në Kosovë, Uilliam Ualker, por për shkak të përkeqësimit të gjendjes shëndetësore të gruas së tij, ai nuk arriti të vinte.
Kronikë e realizuar nga gazetarja, Adea Mustafaj.
