Fondi i Kosovës për Efiçiencë të Energjisë ka mbajtur ceremoninë e nënshkrimit të marrëveshjeve me komunat përfituese për projektin “Zbatimi i masave të efiçiencës së energjisë për ndërtesat shumë-banesore sociale”.
Ministrja e Ekonomisë, Artane Rizvanolli ka thënë se përfituese të kësaj marrëveshje janë: Prishtinë, Skenderaj, Klinë, Drenas, Gjilan, Viti, Kamenicë, Obiliq, Istog dhe Malishevë.
“785 familje në nevojë (rreth 3,400 qytetarë) do të kenë kushte më të mira jetese pasi 22 banesa sociale ku jetojnë, përmes investimit prej 5.5 milionë euro do të kenë:
– Izolimin e kulmit
– Izolimin e mureve
– Dyer e dritare të reja
– Sistemin e ngrohjes për secilën familje
– Renovimin e hyrjeve
– Sistemin e interfonisë
– Masat për mbrojtje kundër zjarrit dhe detektorët e tymit“, ka shkruar ajo.
Tutje, ajo ka thënë se nga të gjitha projektet e investimet që janë bërë gjatë këtij mandati, ky është më i veçanti sepse prek direkt shtresat e cënueshme të shoqërisë që sipas saj, kurrë më herët nuk janë trajtuar me kujdesin e duhur.
„Falemnderit European Union in Kosovo për përkrahjen financiare për këtë projekt, si dhe Komunave për bashkëfinancim të 10% të vlerës së projektit“, ka shkruar ajo.
