Udhëzimi Administrativ për qeset e plastikës u finalizua. Disa prej tyre do të ndalohen krejtësisht, e disa do bëhen me pagesë.
Sipas qytetarëve kjo është dashur të praktikohej kaherë. Ndërsa për shoqatën Konsumatori një veprim i tillë i menjëhershëm është i papranueshëm.
Përdorimi i qeseve të plastikës falas tash e tutje do të jetë i mundur vetëm për qeset që përdoren për fruta nga 0 deri në 25 micron.
Ndërkohë, në Udhëzimin Adminsitrativ për qesen e plasiktës, qeset nga 25 deri në 50 micron do të kushtojnë 5 cent.
E përdorimi tjetër i tyre është ndaluar plotësisht.
“Me udhëzimin administrativ që ka të bëjë me qeset e plastikës do të ju informoj se do të kemi ndalim të qeseve të plastikës nga 0 deri 25 micron. Pra qeset e holla të plastikës të cilat përdoren sot dhe mund të merren në markete falas do të ndalohen plotësisht. Nga 0 de 25 micron do të lejohen vetëm qeset të cilat përdoren për fruta e nuk do të kenë ato mbajtëset. Ndërsa qeset nga 25 deri në 50 micron do të lejohet përdorimi i tyre dhe do të kushtojnë 5 cent por nuk do të lejohet që të kenë logo të prodhuesve”, ka deklaruar ministri i Mjedisit dhe Planifikimit Hapësinor, Liburn ALiu.
E qytetarët janë pro këtij vendimi.
Madje ata thonë se një gjë e tillë është dashur të praktikohej kaherë.
Mirëpo ndryshe po mendojnë nga Shoqata e Konsumatorit.
Për ta një veprim i tillë është i papranueshëm.
“Unë mendoj se nuk është mirë që të ndalohen menjëherë sepse do të ishte një veprim tejet radikal dhe tejet i pakuptueshëm dhe i papranueshëm për të gjithë pjesëmarrësit në treg. Mendoj që pagesa, kompensimi ose kyqja e konsumatorëve në proceset e mbledhjës dhe mbrojtjes së mjedisit do të ishte ideja më e mire”, ka deklaurar Selatin Kaçaniku nga Shoqata Konsumatori.
Kosova ishte ndër shtetet e vetme në rajon që i kishte falas qeset e plastikës. Në kryeqytetet e rajonit, e edhe ato evropiane, qeset e plastikës janë me pagesë. Kjo, si formë për të reduktuar përdorimin e tyre.
Autore: Lendrina Kodrolli
