Përfaqësues të Kosovës dhe Serbisë ndodhen sot në Bruksel për takimin e radhës në kuadër të dialogut për normalizimin e marrëdhënieve.
Ndërmjetësuesi evropian i procesit, Mirosllav Lajçak, priti fillimisht kryenegociatorin e Kosovës, Besnik Bislimi, ndërsa aktualisht është në takim me delegacionin e Serbisë, të kryesuar nga Petar Petkoviq.
Takimi i përbashkët trepalësh nuk është ende e sigurt se do të ndodhë.
Bashkimi Evropian paralajmëroi një ditë më herët se do të shtojë trysninë mbi dy vendet për të zbatuar marrëveshjen e arritur një vit më parë për normalizimin e marrëdhënieve.
Bisedimet, megjithatë, mund të mbeten nën hijen e ndalimit të dinarit serb në Kosovë – temë kjo, po ashtu, e paralajmëruar nga BE-ja.
Me një rregullore të Bankës Qendrore, Kosova e ndaloi përdorimin e kësaj valute më 1 shkurt, duke e bërë euron mjet të vetëm pagese. /REL/