Ka filluar seanca e jashtëzakonshme në Kuvendin Komunal të Prishtinës.
Pika e vetme e rendit të ditës është anulimi i vendimit për këmbimin e një prone komunale “Prishtina e Re” me një pronë private në Badoc.
Gëzim Sveçla nga VV-ja iu bëri thirrje të gjithëve që të dalin pro anulimit të këtij vendimi.
Ndërsa këtij i është kundërpërgjigjur kryetari, Përparim Rama, duke thënë se kur është miratuar ky vendim, nuk ka reaguar askush.
Seanca u thirr të dielën nga Partia Demokratike e Kosovës dhe Lëvizja Vetëvendosje, që të dielën mblodhën nënshkrimet e nevojshme.
Gjykata Themelore e Prishtinës së fundmi e ka miratuar kërkesën e Institutit të Kosovës për Drejtësi për ta shtyrë ekzekutimin e vendimit të Kuvendit Komunal të Prishtinës për këmbimin e pronës komunale në “Prishtina e Re” me prona private në Badoc.
Një tokë në Badoc, ku planifikohej ndërtimi i një lagjeje është vendosur nga Kuvendi Komunal i Prishtinës që të këmbehej me një pronë gati trefish më të madhe në zonën Prishtina e Re.
Asamblistët e Lëvizjes Vetëvendosje kishin ndihmuar për ta bërë kuorumin kur u mor vendimi për këmbim në dhjetor të vitit të kaluar.
Kryetari i Prishtinës, Përparim Rama insiston se procesi i këmbimit të pronave, për të cilin thotë se ka filluar në qeverisjen e kaluar, është i ligjshëm. Ai thotë se Ministria e Financave i ka vlerësuar tokat para se ai të vinte në karrigen e kryetarit dhe sipas tij, pronën në Badoc me 8 milionë euro, ndërsa atë komunalen me 3 milionë euro. Ndërsa ministri i Financave, Hekuran Murati, thotë se për këtë vendimi i takon Komunës dhe duhet pyetur Komuna.
