Filipinet nënshkruan të mërkurën një pakt ushtarak me Zelandën e Re, duke u lejuar forcave të tyre të zhvillojnë ushtrime të përbashkëta.
Presidenti filipinas, Ferdinand Marcos Jr. ishte i pranishëm në ceremoninë në Manila, ku Sekretari i Mbrojtjes, Gilberto Teodoro Jr dhe homologia e tij nga Zelanda e Re, Judith Collins, nënshkruan Marrëveshjen për Statusin e Forcave Vizitore.
Traktati përcakton kornizën ligjore për të lejuar angazhimet ushtarake të të dy vendeve, duke përfshirë stërvitjet e përbashkëta në territorin e njëri-tjetrit dhe aktivitete të tjera bashkëpunuese. Është miratuar nga zyrtarët e Zelandës së Re, por ende duhet të ratifikohet nga Senati i Filipineve që të hyjë në fuqi.
Përpara nënshkrimit, Collins tha në një deklaratë se “ne jemi të përkushtuar për të rigjallëruar marrëdhëniet tona të sigurisë, për të luajtur rolin tonë dhe për të punuar me partnerë rajonalë si Filipinet për të mbështetur rendin ndërkombëtar të bazuar në rregulla”.
Teodoro i tha Associated Press në një intervistë muajin e kaluar se Filipinet do të vazhdojnë të ndërtojnë aleanca sigurie me vende të tjera mike për të penguar agresionin e Kinës.
Veprimet armiqësore të Kinës, tha Teodoro, duhen konsideruar si një kërcënim global sepse ato përfundimisht mund të kufizojnë lëvizjen në Detin e Kinës Jugore, një rrugë kryesore tregtare globale e rëndësishme për zinxhirët globalë të furnizimit.
Kina pretendon praktikisht të gjithë Detin e Kinës Jugore dhe ka vendosur flota të rojes bregdetare dhe të marinës, si dhe anije të dyshuara të milicisë për të ruajtur atë që ajo e quan territor dhe hapësirë ajrore të saj.
Vietnami, Malajzia, Brunei dhe Tajvani gjithashtu paraqesin pretendime që bien ndesh me ato të Kinës, por konfrontimet territoriale janë ndezur veçanërisht midis Pekinit dhe Manilës në dy vitet e fundit.
