FIBA Evropa ka njoftuar të martën se ndeshja mes Caledonia Gladiators dhe Trepçës është pezulluar. Kjo ndeshje është dashur të zhvillohet të mërkurën mbrëma në Skoci, në kuadër të xhiros së fundit të fazës grupore të FIBA Europe Cup.
Por skuadra mitrovicase nuk është pajisur ende me viza të Mbretërisë së Bashkuar dhe për këtë arsye i ka dështuar udhëtimi për në Skoci.
“Ndeshja e stinorit të rregullt të FIBA Europe Cup në mes të Caledonia Gladiators dhe KB Trepça nuk do të zhvillohet në terminin e caktuar për arsye logjistike. Ndeshja e Grupit H ishte planifikuar të luhej të mërkurën, më 13 nëntor, por tashmë është pezulluar zyrtarisht. Çdo njoftim i mëtejmë në lidhje me ndeshjen do të komunikohet me kohë”, shkruan në njoftimin e FIBA-s.
Trepça e Caledonia tashmë janë pa gjasa për avancim. Kampionia e Kosovës në basketboll, Trepça, ka humbur pesë ndeshjet e deritashme në FIBA Europe Cup. Caledonia ka dy fitore e tri humbje.
Trepça të martën mbrëma njoftoi se ndeshja është shtyrë për një datë tjetër “si pasojë e vonesave administrative në procesim të vizave hyrëse për Britani të Madhe”.
Shumë rrallë ndodhë që një ndeshje e kupave evropiane të shtyhet apo të anulohet për shkak të vizave.
