Federata e Futbollit të Kosovës (FFK), ka njoftuar të martën se ka mirëpritur futbollistin e talentuar Belgin Jashari, i cili së fundmi ishte viktimë e një sulmi të papramueshëm gjatë një ndeshjeje futbolli në gjeneratat e reja.
Për këtë ngjarje, pati reagime të shumta në opinionin publik dhe Belgin Jasharit iu dha përkrahje e madhe nga të gjithë.
FFK-ja, ka bërë të ditur se edhe një herë e dënon fuqishëm çdo formë të dhunës, teksa vendimet për lëshimet në organizimin e ndeshjes nga klubi vendas tashmë janë marrë, në përputhje me rregulloret e garave.
“FFK është e vendosur që të luftojë pa kompromis çdo akt diskriminues dhe të kujdeset që futbolli të vazhdojë të mbetet një hapësirë e barazisë, respektit dhe bashkimit. Ngjarjet me sfond racor, gjinor apo fetar nuk kanë vend në sportin tonë!”, ka shkruar FFK-ja.
FFK-ja, ka shtuar se është krenare me Belginin dhe forcën e qetësinë që ka treguar kurse ka premtuar se ofroj gjithmonë përkrahje jo vetëm atij por të gjithë fëmijëve që po rriten si futbollistë nëpër fushat e futbollit në Kosovë.
Gjatë takimit me kreun e FFK-së, Agim Ademi, futbollistit të talentuar Belgin Jasharit i është dhuruar një fanellë e Kosovës me numrin 7 dhe një top futbolli.
