Fetoshi ka kritikuar qasjen ndërkombëtare në raport me konfliktin mes Kosovës e Serbisë.
“Për fat të keq në këto 23 vite, qasja ndërkombëtare për ta mbyllur konfliktin e Kosovës dhe Serbisë e ka mbivendosur të drejtën humanitare. Profesor Hoti është simboli i një konflikti të pambyllur mes Kosovës dhe Serbisë”, tha Fetoshi në emisionin “Këndi i Debatit”.
Sipas tij, institucionet e Kosovës që nga viti 2008 nuk kanë qenë të përfshira sa duhet në këtë çështje.
Teksa shtoi se Serbia këtë situatë e ka përdorur si instrument politik kundrejt Kosovës.
“Nga viti 2008 e mbrapa institucionet e Republikës së Kosovës nuk kanë qenë sa duhet të zëshme. Një tragjedi të tillë edhe pas 12 qershorit të vitit 1999, Serbia ka arritur ta përdorë si instrument politik kundrejt Kosovës. E në këtë rast përveç institucioneve tona, qasja e organizatave ndërkombëtare që merren me këtë çështje, ka qenë e gabuar”, tha tutje ai.
Më 16 maj të vitit 1999 në rrethana ende të pa ndriçuara, është zhdukur Ukshin Hoti. Ai për aktivitetin e tij atdhetar ishte arrestuar disa herë nga regjimi i Titos dhe ai Milosheviqit.
