Profesori universitar, Arben Fetoshi, vlerësoi se thelbi i marrëveshjes së 18 marsit në Ohër, është zhbllokimi ndërkombëtar i Kosovës.
Madje, Fetoshi deklaroi që marrëveshja është dizajnuar në atë mënyrë që të mos ketë humbës e as fitues.
“Marrëveshja është dizajnuar në atë mënyrë që më 18 mars të mos ketë as humbës e as fitues. Mirëpo, efektet e 18 marsit nuk mund të jenë neutrale. Efektet ose do shkojnë në favor të Kosovës, ose do të shkojnë në favor të Serbisë. Thelbi i marrëveshjes së 18 marsit, është zhbllokimi ndërkombëtar i Kosovës. Në qoftë se kjo nuk arrihet, atëherë për çfarë marrëveshje flasim. Më shumë se 10 vite dialog janë kohë shumë e humbur për Kosovën”, theksoi Fetoshi në emisionin “Këndi i Debatit” në Tëvë1.
Më tej, Fetoshi tha se Serbia përmes dialogut ka arritur ta mbajë Kosovën peng në shumë procese zhvillimore.
“Ekzistenca e Kosovës nuk guxon te varet nga njohja formale ose jo e Serbisë”, shtoi tutje Fetoshi.
Derisa shtoi që Serbia tanimë duhet të detyrohet për ta pranuar realitetin e ri politik në Ballkanin Perëndimor./teve1.info/.
