Profesori universitar, Arben Fetoshi ka deklaruar se takimi i dytë i thirrur nga ambasadori amerikan në Kosovë, Jeffrey Hovenier për çështjen e themelimit të Asociacioni të Komunave me Shumicë Serbe është shantazh ndaj Qeverisë.
Fetoshi ka thënë se ende nuk ka një qëndrim të qartë të Qeverisë e as të spektrit politik lidhur me Asociacionin.
“Takimi i dytë i thirrur nga ambasadori amerikan për mua nënkupton shantazh ndaj Qeverisë për rezistencën e saj lidhur me çështjen e Asociacionit. Për shkak se realisht nuk e kemi një qëndrim ende të qartë të Qeverisë e për fat të keq e as të krejt spektrit politik në Kosovë lidhur me këtë sfidë për Asociacionin”, tha ai në emisionin “Këndi i Debatit” në Tëvë1.
Sipas tij, Kurti ka dështuar të jap provimin sa i përket angazhimit të tij për konsensusin politik përball Serbisë.
“Gjashtë kushte të Kurtit janë të javës së kaluar ndërkohë që sot ai prapë deklaron qe sot ai sërish deklaron se Asociacionin nuk bëhet. Kakofonia që e ka karakterizuar diskursin politik të pozitës dhe opozitës lidhur me temën e asociacionit ka qenë shumë e dëmshme dhe vazhdon të jetë e dëmshme. Kryeministri ka dështuar të jap provimin sa i përket angazhimit të tij për konsensusin e domosdoshëm politik përballë Serbisë në fazën e fundit të dialogut”, përfundoi Fetoshi. /Teve1.info/
