Këto deklarata ai i bëri në emisionin “Këndi i Debatit” në tëvë1, duke folur rreth vendimit të Qeverisë së Kosovës për konvertimin e targave ilegale në ato “RKS”.
Sipas tij, bojkotimi i institucioneve nga serbët do të jetë i dëmshëm për Kosovën në fazën finale të dialogut.
“Në anën tjetër kemi një luftë deklaratash të cilat mendoj që nuk e reflektojnë lojalitetin dramatik në të cilin ndodhemi sot për shkak se jam i bindur që prej fundjavës së kalaur Kosova ka hyrë në një fazë kritike të zgjidhjes finale me Serbinë. Duke parasysh bojkotimin nga ana e Serbëve të institucioneve të vendit tonë dhe mendoj që bëhet fjalë për një prapakthim shumë të dëmshëm i cili do të na kushtojë në fazën finale të dialogut”, tha ai.
Fetoshi thotë se për të janë shqetësuese edhe “simptomat e para” ndaj Qeverisë së Kosovë nga aleatët ndërkombëtarë pas mosshtyrjes së këtij vendimi siç kanë kërkuar Shtetet e Bashkuara të Amerikës.
“Nuk e besoj edhe pse natyrisht do të doja të jem rezervuar sa i përket vullnetit politik të Kurtit nëse do të shtyjë ose jo vendimin sipas rekomandimeve ndërkombëtare, pra që lidhet me afatin për vendimin e tij për targat në veri. Por, përtej kësaj ajo çka mendoj më shqetësuese lidhet me simptomat e para të Qeverisë nga partneri ynë, SHBA. Dhe nëse kjo është e vërtetë edhe pse ende nuk jemi në fazën kur kemi marrë vesh në mënyrë eksplicite për këtë fola për simptomat duke iu referuar vizitave të planifikuar të ministres Albulena Haxhiu dhe Shpejtim Bulliqit në anën tjetër. Mungesa totale takimeve të nivelit të lartë ndërkohë që kemi pasë një pritje shumë zemërgjerë të Kurtit dhe Osnmanit në Paris”, tha ai.
Madje, profesori përdori një metaforë për të treguar prishjet eventuale të vendit me SHBA-të por edhe aleatët tjerë ndërkombëtarë.
“Pra ara sot në Kosovë mund të lëvrohet edhe me parmendë edhe traktorë. Mirëpo ata që e lëvrojnë me parmendë besoj që humbin kohë edhe cilësinë e kanë shumë më të dobët, sepse ekziston traktori… Metafora ime ka të bëjë pikërisht në raportin tonë me SHBA-në. Pra nëse ne përmes veprimeve tona cenojmë raportin strategjik me SHBA jam absolutisht i sigurt që pasojat do të jenë dramatike për finalen tonë në raport me Serbinë”, tha ai./teve1.info/