Sipas Fetoshit, Serbia ka ndjekur e do të vazhdojë që të ndjek politikë të dyfishtë dhe siç u shpreh ai, ky është një momentum i ri gjeopolitik që duhet të jetë alarm për Perëndimin.
“Serbia ka vazhduar dhe do të vazhdojë që të ndjek politik të dyfishtë, sepse qasja e saj edhe me Perëndimin dhe Lindjen deri më tani i ka sjellë rezultate shumë pozitive. Ne po themi që është momentum i ri gjeopolitik që duhet të jetë alarm për Perëndimin. Ajo që ne duhet të bëjmë është zhurma, është ajo që ne mund të insistojmë te SHBA-ja për qasjen agresive të vazhdueshme të Serbisë ndaj Kosovës dhe ne kemi mundur që të kërkojmë të jemi më të zëshëm të Brukseli”, tha ai.
Fetoshi në emisionin “Këndi i Debatit” në Tëvë1, ndër tjera tha se Kosova problemin kryesor e ka konsolidimin e subjektivitetit ndërkombëtar.
“Problemin kryesor e kemi konsolidimin e subjektivitetit tonë ndërkombëtar. Serbia nuk ka asnjë problem sa i përket subjektivitetit ndërkombëtar dhe përveç kësaj Serbia është plotësisht e shtrirë në tregun e Kosovës sa i përket produkteve të veta. E dyta Serbia e ka kushtin e normalizimit me Kosovën në kuadër të integrimit evropian, mirëpo Serbia është e vetëdijshme që ende nuk është gati për anëtarësim në BE, dhe në kapitullin e 35-të, BE-ja ia ka vendosur normalizimin me Kosovën që do të thotë që Serbia këtë çështje mund të lë në fund fare”, ka thënë ai.
Sipas tij, “Interesi i Kosovës është që të ndjek politikë ofanzive që ta ndërrojë narracionin ndërkombëtar”. /teve1.info/
