Fetoshi për Tëvë1 tha se Qeveria e Kosovës e në veçanti kryeministri Kurti duhet të shfrytëzojë momentumin e ri politik.
“Qeveria jonë, në veçanti Kurti duhet të angazhohet fuqishëm si dhe të aktivizohet në drejtim të Bashkimit Evropian edhe në Drejtim të Shteteve të Bashkuara të Amerikës, ta shfrytëzojë rreshtimin e Serbisë me Rusinë në kuadër të zhvillimeve të fundit. Si dhe ta shfrytëzojë momentumin e ri kur nuk kemi asnjë rrezik që ta kemi Putinin si palë problematike në fazën finale të dialogut me Serbinë”, tha Fetoshi në emisionin “Infonata” në Tëvë1.
Mirëpo, sipas tij rëndësia e takimeve të sotme në Berlin ka të bëjë me rikthimin e vëmendjes së faktorëve perëndimorë lidhur me çështjen e dialogut Kosovë-Serbi.
Teksa shtoi se Kosova në kohët e fundit ka pasur vëmendje të shtuar të Shteteve të Bashkuara të Amerikës duke filluar nga vizita të shumta të senatorëve, e së fundmi edhe vizita e ndihmës sekretares së SHBA-së, Karen Donfried.
“Rëndësia e takimeve të sotme në Berlin, besoj që është në vazhdën e vëmendjes së rikthyer të faktorëve perëndimorë në çështjen e dialogut Kosovë-Serbi. Kemi parë kohëve të fundit vëmendje të shtuar të Shteteve të Bashkuara të Amerikës me vizitat e senatorëve para disa ditësh, të ndihmës sekretares ditëve të fundit, pastaj me angazhimin e drejtë për drejtë të Escobar. Në këtë kuadër besoj që iniciativa e kancelarit është gjithashtu tregues për rikthimin e vëmendjes perëndimore në këtë çështje, pikërisht për shkak të reflektimeve që ka invazioni rus në Ukrainë”, shtoi tutje Fetoshi.
