Pas fitores së madhe 1:0 kundër Serbisë të shtunën në Leskovc, Shqipëria, të martën mbrëma shënoi tjetër fitore për të kompletuar festën para ndeshjeve shumë të rëndësishme të nëntorit, në kuadër të kualifikimeve për Kupën e Botës 2026.
Shqipëria arriti fitore me rezultat 4:2 kundër Jordanisë në miqësoren e luajtur në stadiumin “Air Albania” në Tiranë.
Pjesa e parë përfundoi baras, 1:1. Por në pjesën e dytë, Shqipëria realizoi tri gola për ta mbyllur grumbullin e këtij muaji me fitore 4:2.
Autogoli i Mo Abualnadt, golat e Armando Brojës, Arbër Hoxhës dhe Nedim Bajramit, ishin emrat e shënuesve në fitoren bindëse të kuqezinjve që festuan me tifozët vendës fitoren e madhe ndaj Serbisë.
Me fitoren 1:0 ndaj Serbisë, Shqipëria ka bërë hap të madh drejt plejofit për kualifikim në Botërorin që vitin e ardhshëm mbahet në SHBA, Kanada dhe Meksikë. Zë vendin e dytë me 11 pikë në Grupin K.
Më 13 nëntor, Shqipëria e ka ndeshjen e parafundit. Luan në udhëtim ndaj Andorrës, kurse më 16 nëntor e pret në Tiranë favoriten e grupit, Anglinë.
