Me të shënuar ora 07:00 e mëngjesit, qytetarë serbë të Kosovës por edhe nga Serbia erdhën për të festuar “ Vidovdanin”.
Veçse për dallim nga vitet paraprake, të mërkurën ata u mblodhën në oborrin e Manastirit të Graçanicës.
As këtë herë nuk munguan mbishkrimet nacionaliste në veshjet e tyre.
Madje me këtë veshje, hynë e dolën në oborrin e Manastirit pa u penguar nga Policia e Kosovës.
Ndërkaq, edhe brenda hapësirave ku mbahej ceremonia u shfaqën simbole të shtetit serb por edhe thirrje provokuese si “Nuk e japim djepin e Serbisë”, “Djemtë e Kosovës” e “Rrënjët e Mia”.
Para pjesëmarrësve, patriarku Porfirije tha se në këtë tubim erdhën që të luten për paqe.
“Për ju vëllezër dhe motra që jetoni në Kosovë, ne kemi ardhur të lutemi me ju, t’i përulemi forcës dhe vendimit tuaj për të ruajtur vendet tona të shenjta në Kosvoë. Me lutjen tuaj dhe qëndrueshmëria dhe ne të tjerët shërohemi nga brenda, lindim përsëri dhe fillojmë të kuptojmë se gjëja më e rëndësishme është të kërkojmë së pari mbretërinë e qiejve, të besojmë në dashurinë e Zotit”, tha ai.
Porfirije uroi edhe besimtarët myslimanë me rastin e festës së Kurban Bajramit.
“Por ne e dimë se nuk do të ketë kurrë paqe, nëse nuk është në shpirtrat tanë. Dhe ne jemi mirënjohës ndaj jush që na kthjellët me shembullin tuaj. Ju gjithashtu na shëroni me lutjen tuaj dhe besimin tuaj ortodoks. Kisha jonë nuk do të harroje askënd dhe nuk mund ta lërë. Vëllezërit mysliman sot e kanë festën e Bajramit dhe unë ua uroj”, deklaroi ai.
E gjatë gjithë kohës sa po mbahej kjo ceremoni, forca të shtuara të Policisë së Kosovës po patrullonin zonën.
Derisa përkohësisht u bllokuan edhe rrugët kryesore.
Në afërsi të Manastirit të Graçanicës u panë edhe pjesëtarë të KFOR-it, EULEX-it por edhe Karabinierët italianë.
Manifestimi i Vidovdanit këtë vit u organizua në Manastirin e Graçanicës dhe jo në Gazimestan, siç bëhej deri tash, për shkak të siç thanë, situatës aktuale të sigurisë.
